علمني الخيابة والنبي يابا قاله تعالى في الهايفة واتصدر

لما تجيلك رسالة قصيرة يوم رأس السنة
وإنتى بتفكر ازاي هتقضي الليلة دي مع أهلك أو أصحابك
تلاقي الرسالة بتقولك تعالي نصلي
ونختم القرآن في الوقت اللي ناس كتيرة بترتكب فيه معاصي
ليلة رأس السنة ويا رب يثبتنا
!!!!!!!!!!!!!!!!!؟؟؟؟؟؟؟؟؟؟؟؟؟؟!!
إيه ده إيه اللي احنا وصلناله ده
ايه العقليات الفارغة دي والمصيبة
إنها تجيلك من واحد أو واحدة
على درجة غير قليلة من التعليم
صدمة أصابتني بعد اللي قرأته
افتكرت على طول المثل اللي كتبته
علمنى الخيابة والنبى يابا ,قاله تعالى فى الهايفة واتصدر
بجد خيابة وتفاهة وفراغ عقلي وسطحية وحالة من الفوضى اتسربت لنفوسنا
حالة من التيه خلتنا ننشغل بتوافه الأمور وأصابتنا بالعمى عن أكثرها بداهة
بل أفقدتنا القدرة على الحكم على ما هو مقبول ومرفوض والتمييز بين الحرام والعيب
وغذت حب تعذيب النفس والانتقام منها والتضييق عليها والتقليل من قدرها وقدراتها
ما حدش قال الناس ماتفتكرش ربنا
في كل وقت بالعكس احنا ماينفعش نعيش من غير مانفتكره
ونتفكر في ديننا مسيحي أو مسلم ونصلي ونقرأ قرآن كل يوم وورد كل يوم في السنة كلها
ليه انهارده؟ ليه الليلة دي؟ تشفي من مين ؟ ونكاية في مين؟ وعلى حساب إيه؟
اللي أرسل الرسالة رافض مظاهر كلنا رافضنها كلنا رافضين إن الليلة دي تكون عذر لكبائر وسلوكيات لاأخلاقية زي ما كلنا بنرفض اللي ما بيشتغلش بإتقان لأنه صائم
لازم نفتكر ربنا بس مش بالأسلوب ده اللي لا يناسب الدين ولا مكانته
الدين اكبر من كده بكتير
الدين مش سلعة بيتعمل عليها عروض تخفيض في أوقات المواسم
وكأن الروح الإستهلاكية والإستغلالية اتسربت لقيمنا وأحاسيسنا وفهمنا للأشياء
رحمتك بينا يا رب
وكل سنة وانتوا طيبين